مساحة إعلانية
بسمع أناتك طول الليل
قلبى ينمل
فببص فى عينك وملامحك
وانا بتأمل
ازاى شايل كل هموم الدنيا
ولسه مكمل
وبترسم للناس على وشك ضحك مزيف
طب فيه بنى ادم فى الدنيا
بعذابه وبشقااااه يتكييف
كتمانك ليه ممنوع م الصرف
جواك بركان كلمات لكن
ممنوع تنطق منهم ولا حرف
والحزن بيجرف قلبك جرف
روحك شايفاك
بتدور جواها على دواك
فتلاقى علاجك وتسيبك
وتداوى الكل
وتستثناك
شايفاك ميت
فبتتخطاك
---------
وحليم ذكراه متلخبطه فيك
وقت أما زمان كنت بتسهر
تسمع منه غنوة... اهواك
ماتقولى يا ليل
ازاى بتضيف ابو قلب نضيف
فى دفاتر محجوزه لضحاياك
-------------------
يا احمد
ازاى الشمس بتتلأ لأ
وبتضوى قلوب الناس تِماً
وتيجيك وحدك وتقولك لأ
مع ان الشمس بتتلأ لأ
والقمر الحالك
المتهالِك
يشبه حالك يوم مانشق
يسرق ضيه
وينور كل الناس إلاك
ومفيش ولا نجمه
تزور ليلك
ولا حتى سماك
الكوكب , متكاتف ضدك
وانت حنين تشبه جدك
ف الله يعينك
طب تسمع عن نبض حنينك
رافع ضدك حق الفيتو لأجل يدينك
وبيسأل زمنك وسنينك
ازاى بعد اما لقيت الضى
القمره الحلوه اللى ماليها زى
وعينها السود تيجى ف عينك؟
فتقوم هى مطلعه عينك
مش هى العين
اللى ابتسمتلك واكتحلت
مش ممكن نفس العين
شايفاك تتعذب
واستحلت!!!
أحاسيسك ومشاعرك دابت
واتهانت جدا واتسحلت
وتقولى بانك وسط الوحل وتد ثابت
ولنفرض ان انا صدقتك
هتصدق ميتى انها سابت
وانسابت منك زى الرووح
سيب الناس الغداره تروح
وبلاش صوتك يملى صداه ويعدى مداه
فتزيد الآهه وتزيد الآه
زيك زى حمام بينوح
سيب الناس الغداره تروح
عارفك مجروح
تتقلب طول الليل وتنوح
وتنازع الموت زى المدبوح
وبلعت لسانك من قهرك
من طُهرك ماقدرش تبوح
وبتنطفى ليه زى الشمعه
ويوماتى بتكدب على روحك
عديت فى كلامك ابو لمعه
عيونك فيها بحر دموع
لكن مابينش ولا دمعه
خايف تنهار قدام نفسك
قال يعنى هتتهز الصوره
او يعنى هتتهز السُمعه
يا احمد لو يوم راح تتكلم
ف الناس دى اساسا مش سامعه
وتقول على نفسك قال عايش
وتقولى أسد
وتقولى حديد
وانت أساسا حبة رايش
وماضيك طبق الأصل ليومك
ومفهوش جديد
يا أمل غرقان فى بحور ضلمه
ع الموج متساب هَش وبايش
بتقول على نفسك كييف عايش؟
على ايه بتئن وبتعانى
كل اللى حصل محض أمانى
فلغاية امتى هتفضل عامل بلعانى
حاول تسمع صوتك يااحمد
لو لثوانى
ليه واقف؟
مستنى تمر سفينة نوح
ياخى حتى سفينة نوح رفضاك
بس اللى مافيها بيترجاك
كل اللى مافيها بيترجاك
ينده وبقول اطلع يااحمد
اطلع يااحمد راح نستناك
والموج عالى
الشكل بيخض
الكل اترص
الأشياء اخدت اماكنها
فاتفضل خد
......
يا طوفان
يا طوفاااااااااان
ابلع ريقك حبه
لساه احمد روحه دى شابه
لساه بتفوح منه محبه
مش محتاج غير بس يجمع
اعضائه المهروسه ف كبه
يا طوفان باللــــــــــــــــــــه
باللــــــــــــــــــــه يا طوفان
اصبر حبه
*من مبادرة " كل يوم شاعر" التى يعدها ويقدمها الشاعر حمدي حسين
مساحة إعلانية
