مساحة إعلانية
مساحة إعلانية
ماشية ف عقلى بقالها سنين
بتعدى كل حوارى المنطق والمعقول
للفسحاية الواسعة ف قلبى
كل ما أقول أهى تعبت
تاهت ؛نامت
تصحى!
تلون كل حيطان الروح
وتروح؛ تعلق زينة
ف حبال القلب الدايبة حنين
شفايف ورد بتشبك
ورق الذكرى لحظة بلحظة
ترسم شمس وضلة
وفرحة وطرحة وشجرة حنة
**
على خشبة مسرح ضلع الوجد
تالت ضلع ف صدرى يمين
غنوة ف غنوة ورقص بالية
والموسيقار النابغ قلبى
بيعزف أجمل لحن رومانسى
كل كيانى تحول أوبرا
والجمهور فى كراتى الحمرا
يصفق؛ يهتف
تحيا البطلة
اللى بتنعش دورة عمره
حالة نشوى بتقتل مللى
لما يسيح التلج الراكد
فوق قطبين احلام الأمس
شمسى بتشرق
نسمة تهفهف
تبوس الخد الحلو النادى
للوردايه الواقفه وحيدة
ف حوض العشق
ف اول عطفه جوا القلب
آخر العرض
تطفا الصالة جوا ضلوعى
الجمهور مش عايز يمشى !
زحمة فى قلبى
الزمامير ف كراتى البيضا
التخبيط ف صفايح دمى
دوشة كبيرة وحيرة
الحواديت والهمس بيسرى
فين البطلة؟
مؤتمرات كالعادة ف قلبى
الأخبار ف عروقى بتجرى
بعض مشاعرى بتقول باعت
الورداية بتنفى بشدة
والتأكيد على ان عادتها
ترجع تانى ف نفس الموسم
بالألوان والفرشة وترسم
شمس وضلة وشجرة حنة
وتلعب تانى نفس الدور
ف الحدوتةالخالدة بجسمى
المشكلة مش ف الحدوتة
ولا ف الزحمة
المشكلة دلوقتى ف عقلى
ناقد جدا؛ واعى وفاهم
رفض البطلة تلعب تانى نفس الدور.
مساحة إعلانية
مساحة إعلانية
مساحة إعلانية
مساحة إعلانية
مساحة إعلانية
