مساحة إعلانية
الكلام لما يموت
بيندفن إزاي ؟!
نطق اللّي مات
خرس اللّي بيضج بـ حياة
الخطاوي متكتفة بـ خيط سراب
الفجر عتمة والطير بيخاف م السحاب
صابه العطب
والصمت جوه الروح حطب
والنار بتاكل فـ الضلوع
من غير دُخان .. من غير دموع !
والعمر عدّى واندثر
بين اللّي كان .. واللّي انكسر
يا ويل قلوبنا مـ الأنين
لما بيصرخ فـ الوتين
وتعجز تترجمه الشفايف !
الورد عجز فى الجناين
والربيع صابه العمى
بقى قلبه خايف
الحلم متحنط على باب الخضوع
مستنى دقة قلب تصحيه م العدم
كل الشوارع تايهة فى حضن الوجع
والقلوب مطفية من كتر الندم
بنمد إيدنا للنجاة
نلقى الغرق ارحم كتير م الانتظار
ونغمض العين اللى دابت م السهر
نهرب من النور للمرار
بنده على الماضى اللى كان
يطلعلى من جوف المكان
أحزان بتسخر م الحنين
والروح بتنزف فى الخفا
من غير أثر من غير أنين
وبعد كل العمر ده
والسنين جاية تفوت
عرفت إجابة للسؤال
إن الكلام لما يموت
مالوش كفن ..هو بس بيندفن
فى ضحكة باهتة قصاد غريب
أو فى( أنا كويس) لما تتقال للحبيب
مساحة إعلانية
