مساحة إعلانية
مساحة إعلانية
نفسي ألَّف الساعه تاني
وأستعيد أيام زماني
م الحنين الدمعه نزلت
طعمها مرَّر لِسَاني
كُنَّا أطيَب م الطيابه
قول غلابه
قول خيابه
حتي لما الفِكر يشطح
كُنت أقول يخرب شيطاني
كُنت في القيَّاله حافي
قلب صافي
في الحمول بأعرض كِتافي
مهما باتألِّم وأعاني
لما كان الدم ينزل هات تراب
كُنت أقول يشرب غُراب
فجأه تلقي الجرح طاب
والوجع يصبح أغاني
بأرمي سِنَّه لـ فوووق تجيني
قول دهب وكمان ( لجيني )
قبل ما بيخمر عجيني
بالتمام ترجع سناني
كُنَّا أهل ما كُنَّا جِيره
غدوَه بتكون ع الحصيره
حَد يشنَق تبقي سيره
نضربه علي ضهره يضحك
نضربه بالحُب تاني
نفسي ألِّف الساعه تاني
روحي بتحن لـــــ زماني
مساحة إعلانية
مساحة إعلانية
