مساحة إعلانية
وسط النسيم والغيم ورقصات الطيور
الڨالس كان للبومه مع عصفور
والجو أشبه باحتفال مَلَكي
وأنا واقفه على طراطيف صوابعي بْصَبْر
مستنياك يا حبيبي ست شهور
وشديده بس الدنيا غلبتني
تنميل رجولي أول الخاينين
شدّيت جناح البومه ضحكت لي
مش ضحكه صفرا
ضحكة المساكين
والكائنات من كل نوع إتنين
وكإنهم طالعين سفينة نوح
وأنا وحدي واقفه بدون وليف وبانوح
كات تختلف لو حضني كان طايلك
لو باحتفل ويّاك برابع ذكرى لجوازنا
في آخر شبر مشتاقلك في قلبي
مش شرط في البيت الكبير
لو حتى نسرق من ساعات العمر كام ساعه للقانا
وتكون هدوم الفرحه سايعانا
كات تختلف لو حضني كان طايلك
لو كفّي قادر بس يتسنِّد عليك
"تسوى إيه الدنيا وإنت مش معايا
هي تبقى الدنيا دنيا إلا بيك"
تقطف شفايفي، معتقين العنب
خمره ارتوت بالسر والنفحات
تكشف خبايا القلب والتفاصيل
أسكر وأميل
وأسكر وأميل
جوز اليمام بالنشوه بيرفرف
سايب ل روحه براح سبع سماوات
جايز بلوغ المتعه في الطيران
جايز ملاذ الحي في الأحضان
جايز جمال التوبه في العصيان
و الحاله دي أصدق خروج ع النص
من غير م أخطي العقل والمسموح
أو حتى أخطي العقل والمسموح
أول ما جسمي يكون نبيت أبيض
هانسيب جنوننا يبقى شيء مألوف
مستنظرين معنى اكتمال الذات
لو إيده تزرع جوا جسمي أمان وورد
وتسد في شقوق جلدي بـدفاها
يقدر يطمّن قلبي زيّ زمان
مرعوش في يوليو رعشة النشوان
أنا هاكتب المكبوت في صدري
وهاكتب الواضح
حتى لو هتكون كتابتي فعل فاضح
قادر لهيب الشهوه يحيينا
لما الحدود تنزاح ونبقى مجاز
ولا ليا غير خِلّي الوَفي ملجأ
ولا ليا غير ضِلّي الأصيل عكّاز
يهديني للطيش والجنون، كلمه
يهديني للليل والبراح، مواويل
أسكر وأميل
وأسكر وأميل
وما ينفتل عودي إلا من عوده
والدنيا ترقص ببتهاج.. بس فـ وجوده
يكشف لنا المقسوم ورقُه
مش عيب أدارى سوأتي ف عَرقُه.
واقفه القصيده في زوري زي الشوكه
لا أنا عارفه أنام ولا قادره أبلع ريق
خلص الماعون والقفله محبوكه
والسرد أصعب مـ اللقا يا صديق
مين اللي ممكن يكتبك غيري؟!
مين يهدي روحي يدلّها غيرك؟!
لحظة م أشوف الصوره من عينيك
يغلبني صدق النظره لو تشويش
- وإنت اللي عارف قد إيه غاويه أنتصر للصدق-
صدق اللي بيشوف الحقيقه تحت تأثير الحشيش
صدق اللي بينول مطلبه بالحب - مش قُدره-
صدق اللي زارع قسوة الأيام بخُضره
كان حلم أصدق من رؤى العارف
- العارف اللي بجد مش مدّعي الرؤيا-
كل اللي بينّا كان عَشم وسلام
طايره المشاعر فوق سبع سماوات
هايمه الخطاوي فوق سبع أراضين
وسبع سنابل خضر أكّلُوا ملايين
وإحنا ابتدينا نضفّر الدنيا
وزهدنا نار البُعْد والتفكير
سيبنا اليمام يبني السكن ويطير
يرجع يزوّد قشّه ورا قشّه
دفيان بأُنس حبيبه في العِشّه
طار اليمام للغربه كان صيده
زي مـ اصطدت بشغف سابع قصيده
مش عايزه تصبح سلوتي في كاتبة القصه
أنا عايزه أشوفك وأحضنك
ونكمّل الرقصه.
مساحة إعلانية
