مساحة إعلانية
البنت..
قاعده جنب جامع..
بتفرفط..
الصدر الطرى..
فى بُق الرضيع.
*************
الأسفلت..
فى المستـشفى..
راقـد ع السـرير
حـواليه دكاتـره..
بيحقنوا جـوّاه جنـين
وممرضـه..
بتشد..
من تحت اللسـان..
الترمـومـتر
تسقيه..
ع الريـق الـدوا..
فـيزيد عيـَّـاه
تحـط إيـدها ع الجبين..
ترقيه بوِرْد وأدعـيه..
فـيرجع..
م السـما.. للأرض..
حبـلان.. بالحياة.
**********
الأسفلت..
شـايف فى الفرنده..
ممرضـة قسم الجـراحه..
بتفُك توكة شعـرها..
اللى مسـجون..
تحت زنزانة حِجَاب
فينفلت..
من جراب اللـيل..
قمر زى الرغيف..
تحـزّم الأحـزان..
وترقـص فى المـرايا
والدايا بتشـد..
اللى مغصوب ع الحيـاه.
**********
الأسفلت..
هاجـج م الإوض..
من ريحـة البـنج..
من قَـرص النامـوس
مـاشى بيعـد..
البـلاط والعـيانين..
وشرايط أقراص المضـاد
مرشـوق فى جنـبه..
قسطـره مدوّخـاه
بيجرجـر الكـيس..
اللى ملـيان بالصديد
بيحـدف..
الشـوف للبعيد..
للحـاره ولـبنـت الجـيران
اللى بيرضـع..
من عينيها النعسـانين..
سكـر نبـات الأوليّـا
ساعـات يغـنى..
والحـيطان بتعـيد وراه..
«ساعـات..
أقـوم الصبح
قلــــبى حـزيــــن
أطـــل بـــره البـاب
ياخــــدنى الحــــنين».
**********
الأسفلت..
شايف فى الفرنده..
ممرضـة قسم الطـوارئ..
بتفك له زرار البلـوزه
فيغوص فى موجة حلمها..
الحـران قـوى
فبيرتعـش..
جـوّاها حـواديت البنـات..
اللى بتلعب ع السطوح..
لعبة عروسه
والعريس..
مسجون فى قمقم غربته
والمشـرط..
المعكـوك بدمه ودمها
بيرجـها..
فينفـرط..
عنقـود حـنانها..
ع الإوض والعيـانين.
**********
الأسفلت..
ع الشزلـونج..
فى كُشك الـولاده..
زايد عليه الطلق خـالص..
عمّـال يعضعض فى ملايات..
فـاسخ وراكـه للجنـين..
عشـان يبـوس خـد الحـياه
يهـزه غـربال الشعـير..
يندق له هُـون النجـاه
يعدَّى على منقـد بخـور..
صهـدان قـوى
واحـنا..
اللى نشرب فى المُغات
ونـدارى فى جـيوبنا..
الملبس، والفيشار
والواد بينـزل مبتسم..
ملفـوف..
على رقـابته الخَـلاص.
**********
الأسفلت..
شـايف فى الفرنده..
ممرضـة قسم العـيون..
بتفُـك حمّـالة..
قمـيصها الشفتـشى..
اللى بلون الميكروكروم
بتحط له..
قطـره ندى.. من صـدرها
من بُقـها تسقـيه..
حليبها السكـرى
تدى له..
مفـتاح الدخـول للمملـكه.
**********
الأسفلت ..
شايل كيس سفندى
فى إيـده..
تذكـرة الدخـول
دايـر على الأقسـام..
بيسـأل ع الولـيد
اللى يقـول له:..
ما اتولـدش
واللى يقـول له:..
إطلـع..
فى قسم الحضَّـانات
واللى يشاور له:..
ع الفراغ
ويقـول له:..
نـايم فى التابـوت..
زى المـلاك
ضحكـته ع الشـفه..
أنعـم م القطيـفه
فى كفـوفه..
حباية سفندى وتذكـره
وكان يغـنى..
والمـلايكه تعيد وراه
«ادى اللى كان
وادى القـــدر
وادى المصـــير
راح اللـى راح
ما عادش فاضـل كتير».
*مبادرة "كل يوم شاعر" التى يعدها ويقدمها الشاعر حمدي حسين
مساحة إعلانية
