مساحة إعلانية
يروح العشق وبـ ييجي ..
على هيئة قصايد بيج
بـاحب اللون اللي جاي يُخرُط بنات الشعر
ومليون بنت مافضيتشي أكلمهم ..
عن القلب اللي ممكن يعتزل .. يزهد ..
يخبي العطف والرقة .. عن الإحساس
وملعونة اللي تستحوز على فكري
بجد بجد من يوم ماارتبط قلبي ..
بنبضِك لما كان فكرة ..
وصوتك لما كان بينام ..
ويصحى ف ودني ويغني
بقيت عاشق سبيل غلبان
وعشقي ليكي إجمالي ..
وتفصيلي
بـاشوفك كل يوم حلوة ..
بشكل جديد
بتحلي كل مادا وكل يوم القى الجمال بيزيد
عباياتك بزخرفها ..
فساتينك بألوانها ..
تليق بالطلة والدهشة
مابتسيبليش حدود للبوح
ولما بتلبسي أبيض ..
بيحصل لي ..
هدووووووووء مااعرفش تفسيره ..
لكن بـاحلم يوصلني ..
لحد الكوشة ويسيبني
بتختصري الجمال فيكي
إذا عديتي في الزحمة البنات حواليكي مش باينين
كإنك آخر الحلوات ..
وآخر نسخة في الملكوت ..
وآخر كارت يتوزع على الحلوين ..
وآخر درس في الأحياء ..
وآخر جين
أميرة ف حضرة العشاق ..
ودرويشك أنا ومجذوب
على عتبة عنيكي أدوب
ووصفك بالجمال تافه
لإنك مش يادوب أنثى
وكلمة أنثى تعني لي ..
ولا حاجة
مادمتي بجد في الكلمة ..
وعايشة معايا في الجملة ..
فدا كفاية
أنا مش شاعر اليوم دا
لإني لو بقيت شاعر
يااكون ظالمك ..
يااكون كداب
فخليكي هناك وحدك ..
وخليني هنا وحدي
مافيش كداب يكون شاعر
مافيش شاعر ماهوش كداب
مساحة إعلانية
