مساحة إعلانية
مساحة إعلانية
أنا شاعر
ومش قادر
أفوت الشعر
ولا أفوتك لملكوتك
و لسكوتك
لليل السهد وأسافر
منيش مسحور ولا ساحر
لكن قادر
أقول الشعر في عيونك
وأطوف بالسحر في ظنونك
لا أنا حاوى
ولا ناوى
أسيبك تنبشى الماضى
و أنا راضى
أعيشك لحظة مجنونة
ومفتونة
بليل الوهم و الحيرة
وأنا سيرة
تعيد الماضي و أفعاله
أشوفك وانتى راجعاله
في لبس عروسة مهووسه
تايه في حلم ماضيها
وأراضيها
تاريخ ممدود على آخره
في ليل أسود ملوش آخر
على طوله على نجومه
أحكى وغنى يا شاعر
أنا شاعر
وليل غادر
شيطان ملعون
لكن جنبك ملاك طاهر
أنا عشقتك ضلام حالك
يمكن ينصلح حالك
أنا مشيتك طريق واعر
ومش قادر
أنا معشوقك الواهم
ومش فاهم
منين أبدأ ولا إمتا
في دنيا الخوف مفيش حتة
مدستش أرضها برجلى
وأنا باجرى
وراكى في كل نجع وكفر
عملت في مولدك أراجوز
وقلت يجوز
رمحى وراكى يشفع لى
و لا يبيع لى
في بعدك درهمين صبار
يا خلق تعبت مش قادر
منيش حاوى ولا ساحر
ولا أراجوز ولا شاعر
لكن قادر
أشوفك واحدة حبيتها
نشرت نجومى على بيتها
لكن بعدت وأنا نسيتها
نسيت متاعبها وجروحها
قريت الفاتحة على روحها
وقلت في بالى مش يمكن
إله الكون يسامحها
بعدله بينصف المظلوم
وفضله بيجبر الخاطر
مساحة إعلانية
مساحة إعلانية
مساحة إعلانية
مساحة إعلانية
مساحة إعلانية
