مساحة إعلانية
شفتك ما عرفتكش إزاي ؟
غير من نبرة صوتك بس
لما ندهت عليا بلهفة
وانت معدي في وسط الشارع
لحظة لما لمحتك تهت
و اتلخبطت
ياااه ع الوقت
اتغيرنا كتير يا حبيبي
مرت على قصتنا سنين
شخبط على ملامحها الوقت
يااااه على الوقت
وع الأحلام
كنا اتنين باصين قدام
كنا صغار
مش حاسبين للدنيا حساب
زارعين وردة في كل كتاب
ياااااه عالوقت
كان مصاحبنا
و يااااه عالصاحب لما يخون
غبر لون احلامنا الخضرا
بلونه الباهت
بدل لون وردتنا الحمرا
و سرق العطر
حتى الشجرة العالية هناك
لسه فاكرها ؟
أنا فاكراها
أخر مرة قابلتك فيها
كنا معاها
وكان ويانا الخوف والحيرة
ودمعة كبيرة
دابت من ملوحتها البهجة
نفس الشجرة
اللي اتعودنا نهرب ليها
كل ما علوا السور الشايك
بيني وبينك
نجري عليها
جوز عصافير و ناقصهم عش
كنا تملي في نفس الفصل
فاكر يوم ما ضربنا المستر
و اداك كف
و اداني كف
وشخبط على حرفين اسامينا
بقسوة و غل
يومها خلطنا الخوف بالحب
و اتعلمنا فنون الكدب
اتعلمنا انا وانت نزوغ
بعد الفسحة
ونلعب ويا الريح غميضة
و ازاي رغم الخوف والعتمة
كنا بنقدر نلمس بعض
فاكر أول لمسة ايد
أول بوسة
انفرطت من عناقيد بهجتنا
لما الجارة القاسية شافتنا
و شهقت شهقة
و رقعت صوت
يومها ابويا ضربني وضربك
علقة موت
على السور الشايك بينا
كف المستر
عين الجارة
علقة أبويا
و كل ودان و عيون الحارة
حاسب وانت معدي الشارع
حاسب وانت بتنده اسمي
حاسب وانت بتحدف وردة
دبلت من 20 سنة واكثر
سيبها تنام في كتاب الجبر
واقفل على قصتنا الباب
ياما ورود من قبلنا دبلت
و ياما أبواب
مساحة إعلانية
