منوعات

السلطان قايتباي وبناء القلعة

2024-04-24 01:39 PM -

قلعة قايتباي

كتب عاطف حنفي
السلطان الملك الاشرف ابو النصر قايتباي المحمودي واحد من أهم سلاطين المماليك الشراكسة لما حب يأمن ثغور البلاد وسواحلها عشان حس بخطر من اطماع العثمانيين في التوسع، فيعمل ايه السلطان قايتباي ؟ أمر ببناء قلعه منيعه سنه ٨٨٢ هجريه وانتهى منها سنه ٨٨٤ هجريه مكان فنار الإسكندرية القديم اللي تهدم بفعل الزلزال سنه ٧٠٢ هجريه.
القلعة بيحيط بيها البحر من ٣ جهات ومحاطه بعدة أسوار (السور الخارجي) فيه أبراج دفاعيه والمدخل الرئيسي غير مستخدم حاليا كان فيه أبراج بها فتحات لرمي السهام.
(السور الداخلي) كان فيه ثكنات الجند ومخازن السلاح وبعض ملحقات القلعة.
و(برج المسجد) عباره عن ٣ أدوار فيه دهاليز منهم اللي بيوصل للدور التاني ومنهم اللي بيوصل للمسجد اللي فيه ضريح لشخص مجهول، ده غير الممرات الدفاعيه اللي كانت بتسهل على الجنود المرور بسهوله خلال عمليه الدفاع عن القلعه ضد اي هجمات.
(الدور التاني) كان فيه ممرات وقاعات وغرف داخليه.
(الدور الثالث) ده كان عباره عن قاعه كبيره للجلوس لرؤيه السفن الماره على مدار اليوم، وكان موجود في نفس الدور طاحونة وفرن لطحن الغلال وصناعه الخبز للجنود.
والسلاطين وحكام مصر على مر العصور اهتموا بيها اهتمام كبير زي قنصوه الغوري وبالاخص محمد علي باشا اللي اهتم بيها لدرجه كبيره زودها بالسلاح والعتاد وجدد مبانيها واسوراها وبني الحصون واهتم بتطوير آليات الدفاع لكن على النقيض التاني فالقلعة عانت من الإهمال خصوصا في العصر العثماني وأثناء سيطره الحمله الفرنسيه عليها، والجدير بالذكر كمان ان سنه ١٩٠٤ قامت لجنه حفظ الاثار العربيه بعمليات الإصلاح والترميم والتجديد فيها.