مساحة إعلانية
مساحة إعلانية
ياسر القاضى
كلنا زعلنا من الأزمة الاقتصادية اللى مرت بمصر ، وكلنا سألنا أنفسنا طب ليه الريس برغم وجود أزمة اقتصاديه عالمية إلا أنه بيعمل فى مشاريع ضخمه ؟ وكلنا قلنا مش كان أولى إنه يصرف الفلوس دى على الأكل والشرب وميبقاش فيه زيادة أسعار، كل مشروع عمله الريس كان أهل الخير واقفين ليه بالمرصاد ! وبيحاولوا بكل طاقتهم انهم يقللوا من حجم المشاريع وبيرسموا صورة سيئة للمشاريع دى إنه ملهاش لازمه فى ظل الظروف الراهنة ، تعالوا بينا نسمع القصة من البداية : فاكرين أول ما بدأ الريس بدا بالحرب على الإرهاب داخل سينا ، فاكرين كام شهيد من شهدائنا الأبرار راحوا ضحية علشان يتم تطهير سينا من عناصر الإرهاب اللى كان فاضل شويه والعناصر دى تحتل سينا وكانت تتمنى تعمل منها قاعده تستولى بيها على مصر أولا وبعد كدا تعمل الخلافه اللى بتحلم بيها ، بدأنا نفهم ليه الريس بدأ القصة بالقضاء على بؤر الإرهاب داخل سينا ولا لسه؟ تابع معاى وحاول تفهم ، الخطوه التانيه اللى عملها الريس هو تسليح الجيش المصرى وإعادة بناء قدراته العسكرية بأحدث المعدات العسكرية ، مش كدا وبس لا دا عمل قواعد عسكرية واسعة داخل وخارج مصر وفى كل مكان ممكن تتوقعه ، إنت عارف هو عمل كدا ليه ؟ تابع معايا وحاول تفهم ، الخطوة التالته اللى عملها الريس هو التوسع فى الرقعة الزراعية وعمل استصلاح زراعي لملايين الأفدنة على مستوى الجمهورية بداية من أسوان حتى السلوم مش كدا وبس لا دا عمل مشاريع ضخمه لاستغلال كل قطرة ميه من مياه النيل والحفاظ عليها وشئ اكيد إنت شفت مشروعات تبطين الترع والمصاريف ، ويا سيدى عمل إيه كمان؟ بنى أكبر صوامع لتخزين الغلال على مستوى الجمهورية، إنت عارف هو عمل كدا ليه ؟ تابع معايا وانت هتعرف ، سكت الريس وقال كفايه دا الظروف بقيت صعبه والعالم كله بيعانى من الازمة الاقتصادية ، لا مسكتش وقال هكمل رغم تحمل تبعات المسؤولية ، سكتنا،لا بدا الريس يعمل مشاريع لتصنيع المعدات العسكرية ومصانع للأدوية والمستلزمات الطبية وبدأنا نعتمد لحد ما على الصناعة المحلية ، طب وبعدين ؟ الموضوع لسه مخلصش، بدا الريس فى التوسع في مشاريع الطرق والكبارى وشق قناه جديدة ، انت هتقول وإيه لازمة دا كله ؟ والظروف صعبه ، لا انا هقلك دا لسه فيه مشاريع كتير بس انت مسمعتش عنها ، انت شوفت مشاريع حياه كريمة وإعادة بناء القرى الأكثر احتياجا وتوفير كل الخدمات الحياتيه بيها ، تمام يا سيدى بس أنا ظروفى تعبانه والأزمة الاقتصادية وغلاء الأسعار مخلى المرتب مش موفى معايا وأنا بحاول أفهم بس مش قادر استوعب ، دلوقتى أقدر اقلك : انت شايف الأحداث اللى بتحصل فى غزه ، انت سمعت عن الصفقه اللى عرضتها أمريكا وإسرائيل على الريس مقابل تهجير أهل غزه لسينا ، انت شفت وسمعت موقف الريس لما فضح أمريكا وإسرائيل على الملأ وأعلن صراحة عن المخطط اليهودى لتصفية القضية الفلسطينية ، انت حاسس إيه معنى إن مصر ترفض الصفقه دى وايه اللى ممكن تتخذه أمريكا وإسرائيل ضدها ، أنا سامعك وأنت بتقول إيه يعنى ، بس امريكا ولا إسرائيل تفكر إنها تقرب من مصر شوف إحنا هنعمل فيها إيه ، طب مسألتش نفسك علشان اوقف قصاد أمريكا وإسرائيل لازم أعمل إيه ؟ هقلك : لازم كنت هتعمل كل المشاريع اللى عملها الريس لأن وقت الأزمه لا قدر الله هتكون فى حاجه لكل المشاريع دى ، شوف إيه اللى بيحصل فى غزه وانت تعرف إنك علشان تحارب لازم تكون أقوى من عدوك لو معملتش كدا يبقى انت تستاهل اللى يجرالك لأنك معملتش حسابك كويس ، ساعة الأزمة كل دوله بتدور على مصالحها وحاول تفهم.
hyasser10@yahoo.com
مساحة إعلانية
مساحة إعلانية
