مساحة إعلانية
مساحة إعلانية
حبة تراب من ارض طين
مبلولة بشوية مطر
نزلت مجازاً بالقدر
على ارض خالية من الحياة
حبة تراب ملهاش جديد
مرمية دون لفت انتباه
بتبان يدوب عفرة ف هوا
فتطير بعيد وبتعلا فوق
تلمسها مطرة عشان تفوق
وتعود لمسقط ارضها
تنزل فتعرف انها
لسه يدوب حبة تراب
حبة تراب فيها اتنفخ نسمة حياة
صبحت كيان كائن
ولانها من أصل طين
عن قصد نسْيت تبقى مين
قالت انا
حبة تراب قالت انا!!!
كانت انا
بعمل كأني من هنا
بعمل كأني مش هموت
حبة تراب حبت تعيش
عاشت عشان موتاً تموت
حبة تراب اتمردت علي اصلها
فورثت طبعي منها
فبحب شكلي يكون كده
وبحب لوني يكون جميل
وبحب اكون مالك ف كون
ويكون ف ايدي المستحيل
فببيع بساطتي بسلطتي
ودفنت أصلي ف تربتي
ورفضت اعيش المعطيات
اللي لقيتها ف سكتي
فسعيت اكون أحسن كتير
شاري الغرور بفلوس ضمير
انا عندي بيت واسع كبير
وانا تحت مني حاشية
كل البشر دي تخصني
مالك ومُلكي يهمني
وبكبره وبكبر معاه
انا شكلي حبيت الحياة
فبطير بعيد عالي لفوق
تلمسني مطرة عشان افوق
والقاني طينة لينة
باينه كإنسان ف السراب
انزل فاعرف ان انا
لسه يدوب حبة تراب
مساحة إعلانية
مساحة إعلانية
