مساحة إعلانية
مساحة إعلانية
علشان الأيام صعبه أكيد
راح نحذف كل حروف النصب مع التوكيد
أنا راجل شقيان لجل بأعول
ف بلاش تشغلني بإن دا فاعل
ودا مفعول
وبإن الآخر دا معتل
ودا معلول
هو أنا مسئول
مش فاهم شيء ف بلاش لخبطه
وبلاش تعقيد
كلِّمني يا عم بدون إعراب
ما كفايه الناس بتسِف تراب
إيه يعني المفعول متقدِّم
أو متندِّم
أو حتي علي الفاعل يردم
إيه اللي أنا ح آخده إيجار في الإيد
كلِّمني عشان أنا مش دارس
وطلِعت ما كمِّلت مدارس
بأعرف أعياد رمضان أضحي
وكمان الأم يكون مارس
وأحفظ لبلدنا كتير أناشيد
ف ياريت الموضوع يبقي بسيط
ولا نحتاج حد يترجم لنا
أو يبقي وسيط
إذا كانت كل العيشه
سَلَف
وكمان تقسيط
تبقاشي حويط
ف ياريت نتكلِّم في الموضوع
وكلامنا يكون واضح ومفيد
وإذا كان تقصير يصبح منِّي
ف سامحني لجهلي وإني بليد
مساحة إعلانية
مساحة إعلانية
