مساحة إعلانية
مساحة إعلانية
إنا لله وإنا إليه راجعون
في ذمة الله شاعر العاميه الكبير/ عبد الحميد أحمد علي
لم نلتقي ف سامحني مش بالإيد
أو نرسم القعده بدون مواعيد
البُعد له أسباب
البُعد بالأعتاب
البُعد يرفع قَدر للأحباب
وإن غاب حضوره في القلوب بيزيد
والله ما أعرف حتي فين دارك ؟!
أو ظرفك الصحي ومين زارك ؟!
بمحبه كُنت لَبدت بجوارك
وأَلِف في مَدَارَك كأني مُريد
( لما القمر بيموت ) تعيش فينا
( ساعة صفار الشمس )
كان حُضنك يدفِّينا
( ريحة الشوارع والبيوت )
من ريحتَك تدوب فينا
طاب ( هات من الآخر )
وإوعي البُعد يجافينا
وتوب الشِعر لو داب إنت ترفينا
ساعة التمام الكل عبدحميد
كلمتِني ع الخاص / عام / وات ساب
وكأننا قبل الزمان أصحاب
أفراحي أتراحي
وكل مناسبه تطرق باب
وإنت اللي كُنت الوَقفَه قبل العيد
يا عبحميد أحمد علي سلامات
سلِّم علي ( مغربي )
عايش وعُمرُه ما مات
و ( خفاجي ) قولُّه
ما أتسلي ولا مات
الندوه كِملِت سمَّعونا قصيد
الندوه كِملت سمَّعونا قصيد
_____
_ أعمال الشاعر
_ ديوان ( لما القمر بيموت
_ ديوان ( ساعة صفار الشمس )
_ ديوان ( هات م الآخر )
_ ديوان ( ريحة الشوارع والبيوت )
مساحة إعلانية
مساحة إعلانية
