مساحة إعلانية
مساحة إعلانية
في ثواني بتتشقَّلب بتّ الستِّين
الواحد فيها زى الحافي في قيَّاله
مِندار
لا عارف رايح فين
ولا جاى حتي منين
قضِّيها زى ما بتحب
مش زى ما هيَّ تحب
مالهاش قلب
كل ما بتبوِّط فيها وهاتك ظَب
تتدلدق تتكب
علشان مفتوحه من الجنبين
إوعي تعيشها من غير روح
زى ما قلبك يسحب فيك روووح
خليك في الأرضي خفيف ع الكِتف
إوعي تعيش في سطوح
ونصيحه تسيب الباب مفتوح
وتخلِّي أثر من ريحتك
قُدَّام العتبه بشبرين
حدِّش ضامن الغَفله
ما هي سافله
لما بتعمل قفله
بتسحب ضيِّ القلب
اللي يوصَّل للعين
فاكِر دفنة أبوك أُمَّك
والحاجَّه سُعاد
كُنت بتتظاهر بقواك
علشان مالهومشي سواك
بمجرَّد ما بيفتحوا في العين
والرمله وطوب ويرشوا مياه
علشان الطين يدخل في الطين
وبرغم الزحمه كُنت بتدفنهم جوَّاك
وبقلبك كُنت بتختم بـــ آمين
إيه الفايده تعيشها بالتنقيط ؟!
أو بالتعقيط
ما هو بيلم ترابها
ما يعرف إنَّك إبن أكابر
أو كُنت لقيط
ما هي كُلها بني آدمين
عيشها زى ما جيت
وإن حبِّيت تتمسَّك بيها
ح تسيبَك
وح تجرى وراها بدون رِجلِين
وح تجرى وراها بدون رِجلِين
مساحة إعلانية
مساحة إعلانية
مساحة إعلانية
مساحة إعلانية
مساحة إعلانية
