مساحة إعلانية
مساحة إعلانية
خايف أطلع سِلمة / أوقع
خايف أنزل سِلمة / مرجَعش
مبحسش إلا .. باللي يوجع
وفـ قلبي يجي ٦٠٠ نعش
ساكنة المدافن خوفها جوايا
ناسية الأماكن أصلها وأصْلي
لو كنت أقدر
كُنت أجيب م الحُزن آيه
مش كل ما ألقي الحُزن أغرفلي
بحزن
والحزن فينا زي حلق حوش
فاتح بارات للحزن جوايا
واعرف أصب الضحك مشربهوش !
يقتلني الخوف مرات
وفـ كل مرة أسعفه
أعرف أغني الحزن واعرف أفلسفه..
حزني اللي متضّفر أربع وسايل هَم
ومكمل شَريعته
الخوف / الرعب / الذُعر / الفزع
والفرح بِعته
يعرف يواسي الخايف بخوف أكبر
ويطمن الهادي بخوف مجاش لسه
بيعيش ويتكاثر ويكبر
ويمارس الوحشية والخِسة
يعرف يكون مناضل عليا
ويعمل من الثورية قِصة
يرمي التقاوي فـ أرض مخفية
يزرع يأسه
ويحصده فيا
يقتل مراسي القلب
بموسيقي وسَجع
يتكاثر ..
والحزن بيخلف وجع
والوجع شيطان وسواس
ولا بيعرف قريب وغريب
ولا بيرحم وصال الناس
و الفرح أبتر..
الضربة لو جات م الغريب توجع
والضربة لو جات م الحبايب
توجع أكتر ..
مساحة إعلانية
مساحة إعلانية
مساحة إعلانية
مساحة إعلانية
مساحة إعلانية
