مساحة إعلانية
مساحة إعلانية
عن الهيئة المصرية العامة للكتاب سلسلة الشعر العامي صدر ديوان "دندرمة وكافة شىء" لابن قنا الشاعر والكاتب المسرحى حمدي محمد حسين " أديب متفرغ ".ويعتبر هذا الديوان هو الخامس حيث سبق ان صدر له
1- سكاكين وكفوف .. ديوان شعر .. النشر الاقليمي 2008
2- ديوان شعر .. مجمع مترجم بالإنجليزية " نحن نغني الشعر أيضا "WE SING POTRY TOO ممثلا لمحافظة قنا ..صدر عن مؤتمر أدباء مصر دورة
3- منظر متعدد لخروج الروح ..دار العماد 2015
4- سفر علي ضهر طير بالنفر ..دار ورقات 2019
5-دندرمة وكافة شىء ..الهيئة العامة للكتاب 2023
اعمال ومن اعماله تحت الطبع :
1 - تيجي نغني" أحلامك يا وطن" أغان للأطفال
2 - ديوان شعر " أنا مهدي ليه مش منتظر
3- الأشجار
ومن اجواء الديوان تنشر له منبر التحرير قصيدة :
شخابيط
حمدى حسين
مش انت اللي ف كلامك قلت
مش هكتب قصيدة شعر ف الأحباب
وقلت ان الهوى غلاب
وطيف كداب
هخلي صفحتي بيضا
واسيبهم يكتبوا الأسباب
مش انت اللي
سحبت الضي من عيني
وأرخيت الغطا ع الحلم
وشديتها جفون واهداب
مش انت اللي قفلت الباب
وقلتلي :
طريق الشعر ضيعنا
وودانا ما رجعنا
وخد منا سنين وسنين
وتوهنا مع الحالمين
ولا الأحلام بتتحقق
ولا تصدق
عنب يصبح فى يوم عناب.
ف خد عني
ولو شخابيط
يا أيها المنكر لأقوالك
المرتد ف افعالك
انا حد قضي العمر متهني
وقالوا عني حد عبيط
مضيع عمره ف التنطيط
ما بين امسية للشعرا
وبين أغنية للفقرا
وجبر لخاطر الإنسان
ومن غير صيت .
باعيش اليوم علي رزقي
وبارعى زرعتي وأسقي
وعمري في يوم ما كنت حويط .
لا با حسبها ولا أقلبها
لكن باوزنها بمزاني
وبالتظبيط
باعيد الكلمة لمكانها
وأرد الفكرة لِمدانها
واسيب الرأي للشارع
يمارس لعبة التصويت .
لا مستنى البشر تصحى من الغفله
ولا طرطايه م الحفله
ولا باعمل في يوم قفله..
ولا باهتف ....
يعيش الدعم والتقسيط .
من الكانتو
بأجيب الجزمة وهدومي
وما يلزم لحد بسيط
ولا باحزن من الفرجه على البتارين
ولا باحسد
ولا يعنينى بالمرّه
مين عنده وإيه عنده
ولا قلتش في يوم مرّه
أكيد بالرشوه و التفويت .
وعارف إني مش مهدي ولا عيسى
لكن برضو بأقول وقّف وأقول عدّي
بتطلع وحدها يدّي ..
وأشوط الطوبه جنب الحيط .
وبأضحك قد ما بأقدر ..
ومش بأخسر من التنكيت .
وحافظ جدّ مش خافض جنون الصفح والتبكيت .
من الآخر ..
أنا واحد سعيد راضي
بمر الكاس
ومتلذذ ومش فاضي لسيرة الناس
بنام بدري وبدري اصحي
مع المخاليق ..نبل الريق
نصيد الرزق من خيرها..ولو تنقيط .
وبادعم قد ما باقدر
أيادي العلم بلا واسطه
وأنادي بدولة الأسطى
وزير للعدل والتخطيط .
مساحة إعلانية
مساحة إعلانية
