مساحة إعلانية
مساحة إعلانية
مين قال بإني مش باغير ؟
أنا بس غيرتي من سكات
يا فرحة ساكنة ف قلبي أنا
يا أحلى من كل البنات
زارعة ليِ في القلب اليتيم
شجرة أمل
و ف ضلها باصحى و بابات
يا مركبة
نجتني من موج الحياة
و خدتني للبر الأمان
من يومها
قلبي بيشرب الأحلام فرات
يا وردة مزروعة في شرايين الفؤاد
على غصنه تتفتح
و تتمايل
كما الفراشات
عصفورة إنتِ
لو فتحت الباب تطير
و بسرعة قبل الحزن ما يزورني تعود
جايبة لي من حضن السما
نجمات
جنِّية ساكنة في القلم
من حسنها كتب الفؤاد
أجمل حاجات
ضحكاية
لو زارت وداني
ف عز حزني
ألتقيه عدَّي
و فات
قلبي واثق فيكِ جدًا
والغرام اللي ما بينَّا
في الفؤاد
طارح ثبات
آدي كل المستخبِّي
جوَّة قلبي من سكات
بُحت بيه يبقى دليلي
ع المحبة و إثباتات
فان قالوا لك مرَّة بطَّل يوم يغير
صدقيهم
بس قولي يبقى مات
مساحة إعلانية
مساحة إعلانية
