مساحة إعلانية
مساحة إعلانية
الذكرى الثامنة لرحيل محمود مغربى
في الثالث من سبتمبر 2023م تحل الذكرى الثامنة لرحيل الشاعر الانسان محمود مغربى الذى رحل عام 2015م
عن عمر ناهز الثالثة والخمسين وبمناسبة هذه الذكرى ننشر بعض القصائد التي كتبت في رثاء شاعرنا الراحل
عام 2015م
غناوى الأرض مهداة لروح الشاعر الجنوبي / محمود مغربي
شعر / عبد الباري إمام
غناوى الأرض حزنانة
وطرحتها بلون اللِّيل
لأن السـِّـيل مَسَخ فيها النبات والحَب
وعفَّص كلمة دفيانه بنبــض الحُب
غناوى الأرض حزنانه ، ولا بسه حِدَاد
على حَدَّاد
على اللى لَمـْلَـم اللُّقمه بكَاد الكَاد
ولا رضيشى يخُــش مزاد
غناوى الأرض حزنانه ، وقلبها بَاش
على النجم اللى وسطنا عاش
وراح ولا جاش
ولا باعك يا كلـــــــمه بلاش
غناوى الأرض حزنانه على الرَّاوى
على اللى غَنَّى وسط المسك والجَاوِى
لشرقاوى وجرجاوى
وكان" زكريا حجاوى"
غناوى الأرض بتبَكِّى عيون الناى على "التَّايه" ..
على "حَجَّاجنا " أعظم "باى"
علي محمود
على اللى كانوا يتصافوا بكنكة شاى
غناوى الأرض حزنانه
وما سكه الشَّمعه مطفيــَّــــه
على اللى عاشوا بيغنُّوا لشلبايه وشلبيه
ويبتسموا إذا سكنوا فى جلابيــــه
وكانوا يشربوا فى الكُوز
ولا عرفوا فى يوم " جينـزاً " " ولا فوسكوز "
ولا قلبوا ـ فى يوم ـ البُوز
فى وِشِّ اللِّى يحاديـــــهم
فهل تقدر يا " فارسنا " تناديــهم؟ !
مُحَال طبعـــــــــاً! ولكن رحت عنديهـــــم
" لأن الطير ما بيحنِّش لسَجَّانه "
ولا يفرّط فى ألحانــــــه
ورب الكون بَنَى عشَك فى بستانه
ولكن بعد ما اديتنا :
مفتاح روضة الموال
ووزنة رنة الخلخال
ورسمة قولة القوال وعم وخال
لنص الشُّعرا فى بلدنا
وراية حب ترشدنا
وتوجدنا فى ساحة جدِّنا "أبوللـو "
ـ يا ديوان الأدب كله ـ
لا تلومنى فى إسهابى
كلامى قَطْـرَه من " حـَابِى " * فباسم الغايب الحاضـــر
وباسم الحاضــر الغايب
وفعـــل المؤمن التايب ودمع الشايب الآيب
بنترنم بترنيمه تخلِّلى اللِّيل
يعود تانى بقمرايه ووردايه
ونرسم ربع ضحكايه
غناوى الأرض مفردها بألف حكايه وحكايه
بيولد حرفها الأول بصرخه وبسملة دايه
ويخلَص سطرها الآخر بنَعش ، وخَلْق بَكَّايه
ولانملك سوى ننطق " تبارك " كَمِّلوا الآيــَـه "
مساحة إعلانية
مساحة إعلانية
