مساحة إعلانية
السكات بالليل يخوّف يا صديقي
والغنا ع السكه بيسلّي السواقي
كل شيء في الدنيا كداب مش حقيقي
حتى ضحكة قلب دايس ع الشراقي
خطي يا بطن القدم بشويش طريقي
والبسي يا قلوبنا م الخوف الطواقي
قلبي يا هند انفطر ما بلعت ريقي
لما زارني ف خلوتي صاحبي البولاقي
...................
هتتصور...
أنا باضحك في وش الغير
وقلبي في صدري متعور
وروحي ف جسمي مزنوقه
باحاول أعيش في أوطان خيش
بلاد أصلاً ما تعرفنيش
ما بتشوفنيش
ما بتحسش بصهد الرؤيه خلف الشيش
وصدق الكلمه من جوف دانه مطلوقه
وكل سهامها جوه القلب مرشوقه
وكل خيولها بتدهوس
على الشمس اما بتنور
جعان من ميت سنه عدّت
كإني غيطان بتتبوّر
كأني دموع فتى صييت
كأني نسيت وانا فاكر
وفاكر إني برضه نسيت
ورحت مع الأحبه وجيت
وسميت ضحكتي متاريس
كتب صاحبي اللي ما أعرفهوش
وصلنا الآن حدود برديس
مازال جوانا شيء فاضل
وشيء ممكن
وشيء معقول
وشيء متداري من تزييقة الترابيس
وشيء متخبي م الأباليس
وصلنا الآن حدود برديس
عرفت المعنى والمغزى
وحس القلب بالنغزه
قريت الفاتحه ع الماشيين
وع الأحلام وع الكوابيس
ورحت بروحي وياهم
عشان اقرا الضحى ف برديس
...................
السلام
سلّم عليّا بودّ
واندار واكتمل كالبدر واستكمل مسيره
كل نور في الدنيا عارف خط سيره
كل إنسان حاكمه في الترحال ضميره
والسلام ع القلب لما القلب يصفى
السلام ع الروح إذا الروح استكانت
السلام ع الورده لو ضحكتها بانت
السلام ع الرحله لما تمرّ بهدوء ع الركايب
السلام ع الريح إذا عاد بالحبايب
السلام ع الفارس السايب مكانه لخطوْ طيره
والمحبه الساكنه في مشنّة فطيره
...................
سلّمي يا هند ع الوالد بشوق
واغسلي وشه بقصايد كالنشوق
واقف الشاعر على حدّ الشروق
والبيوت العتمه بتحايل قِمِيره
يا رفاقة روحي يا واقفين جواره
ودّعوه بشويش وعزّوا الطوب في داره
كل خطوة عزّ قادت نور جداره
والكلام الحلو مخبوز من شعيره
طبطبي يا دمعه ع الوزّ العراقي
واغسلي وش الهجاين والنواقي
زارني قبل الفجر في الحلم البولاقي
فجّ نور الصحبه بحصانه وبعيره
يا محامل هدهدي قلبك وهدّي
لما هذا الطِّيف على الكفّين يعدّي
رطّبي يا أرض في ترابك ونَدّي
الفتى المندور هنا مندور بخيره
ودّعي يا هند ابوكي بشعر صافي
قلبنا ع الأرض ماشي يغني حافي
يا ربيب الضيّ يا شهد القوافي
السلام الدافي والشّعر وحصيره
مساحة إعلانية
