مساحة إعلانية
مساحة إعلانية
فين الحقيقة لسه السؤال مطروح
مين اللى شاف الدنيا من أولها
مين اللى عدى الشك لما يلوح
ومين وصل للنور وف لحظة غنالها
عاوز تجاوب بص فى مراية حياتك
يمكن تشوف كم اسم كان يضحك عليك
يمكن تلاقى الحلم واقف بس ميت
وانت فاكره انه صاحى بين ايديك
كل خطوة تحاول تيجى تمشيها
ناس كتير فى هدوم سنينك تشد
كل الطرق صعبة وانت عليك تختار
تمشى فى سكة حلمك تلقى مليون سد
كل سد وله بابين وانت عليك تختار
تدخل وحيد ما تلاقى جنبك حد
ايه اللى شوفته فى الحياة يستاهل
بنعيشها فترة...ومكتوب علينا نروح
ايه اللى باقى من الحكاية نسمعه
غير ذكرى دمعة أو غياب مجروح
مش كل قلب كان صابه العمى
الضحكة قادرة ترجعه
ولا كل من صابه الألم
يلقى قريبه بيسمعه
انت اللى باقى فى السباق وحدك
اوعى الهزيمة تبان فى عينيك
كل اللى ماتوا كان عشمهم يفضلوا بعدك
كل اللى ماتوا أملهم لو يعودوا يومين
مش كل هزيمة بتقتل الانسان
ولا كل ضحكة تحس فيها حنان
رغم الحقيقة تبان انها مرة
لكن جواها شايلة تملى امان
انت اللى باقى ليها من كل اللى راحوا
وانت اللى فاضل لسه جواك نور
قالوا السعادة توبها ما ينشاف
واللى يشوفها فى يوم عمره ما صدقها
ان جه يعيشها يحسها أوهام
ونفسه ضايعه وحيرة تسبقها
يا راكب الحلم سوق واوعى تخاف
تلقى السما صافية وسقفها شفاف
نجوم تنادى عليك فى لسانها كان اسمك
وانت اللى فاضل لسه تبتسملك
حاول تبص لفوق والدفة بين ايدك
تطلع سما ورا سما تقطع وريد قيدك
اطلع خلاص يلا ...مش باقى هنا غيرك
الارض صابها البور ومش شايفه بطل غيرك
وصل اليها النور ..واطرح ثمار خيرك
وصل إليها النور ...واطرح ثمار خيرك
الأرض صابها البور مالهاش بطل غيرك
مساحة إعلانية
مساحة إعلانية
مساحة إعلانية
مساحة إعلانية
مساحة إعلانية
