مساحة إعلانية
الاحمر مش لون الحب
و الأصفر مش لون الغيرة
الأصفر بهجة بنت
بتحب لأول مرة
و لأول مرة تحس
بدقة قلب جديدة عليها
لما يمر الولد العاشق قدام بيتها و يرمي سلام
تفتح له هويس الاحلام
و ان لمحت مرة عيونه و هي بتسرح بين تفاصيل انوثتها الفايرة من تحت قماش الفستان
تحمر خدودها
و يثور جواه بركان
الأصفر نظرة خجولة
في عين البنت اللي في سنة أولى غرام
وإن صهل الشوق بالليل وراودها عن الأحلام
بتغمض بس عيونها
وتدخل جنة
تطرد منها عيون الناس
وترش جناين فل أبيض
علي وش مخدتها
و تنور عناقيد بهجتها
و تنادي حبيبها
ياخدها في حضنه الأوسع من قارة أسيا
تتفتح وردة قطيفة في روحها
و يدور الهمس
على شط البحر الهايج
تجري و يجري وراها
يسابقوا سرب نوارس
طاير يم الشمس
و الصبح تفوق م الحلم
تنفض عن ملايتها البمبي عبيره
و تسك الباب ع الحلم
تلبس مريولها الكحلي و تمشي بحرص
و كأنها لص
اتسلل بره السور الشايك
و سرق من صندوق الدنيا الحلوة لحظة أنس
مساحة إعلانية
