مساحة إعلانية
مساحة إعلانية
عبد الستار سليم
" اليوبيل الذهبى لنصر اكتوبر ، خـمـســين سنة من الانتصار .. والعــــزّة "
صحيت الصبح ..
متخاصم مع نفسى ..
كما العادة
وكانت ترتعش فيّا ..
نجوم الأمس ..
تتصالح .. وِ تتعادَى
وكان القلب جوّايا ..
قمر مكسور
عديم النبض والفرحة ..
عديم النور
وكانت نُصّ أحلامى ..
بتدْهسْـــها ..
مرارة صبر أيامى
تدور الفكرة جـــوّايا ..
كما الساقية
كما السّــبْـع اللى متقــيّد
كموج البحر
لا فانية .. ولا باقية
...................
وفجأة .. شُـــفْـت فى ضْــلوعى
شعاع الشمس
وفجأة .. هزّنى لونُــه
وِ زمْــجر جـــوّا قـــلـبى
الهمْــس
ضربْـــت بقبضتى يأسى
وِ رِجْــعِـتْـلى على صوت الغضب ..
نفسى ..
وما اشعُــر .. إلا والمدفع ..
بيحضنّى
وبيــكبّر .. وبيـــغنّى
وبيـــناديكى يا "سِــــينا"
و جَــدّ الــجدّ ..
فى لحظة تساوى العُـــمر
وبان العزم ..
فى جْــباه الوشوش السُّــمر
وعدّينا ..
وِ جِــــبْـنا الشمس فى إيدينا
...............................
بشوق العمر
يا "سينا"
أنا جِـــيتِــك
نســيت الأم .. وِ عْــيالها
وإنتى عُمْـرى ما نْسيتك
عـــبرْت الجسْــر ..
قبل الجسر ما يتْــــمدّ
ولا بيْـــحوشنى عن حضنك ..
جـــبل .. ولا .. سَـــدّ
حياتى ليكى
يا "سينا"
أنا الرحلـــــة ..
و إنتى الشط .. و.. المِــــينا
عشان الضىّ يرجعـــلِك ..
أنا عدّيت
على كفّ القدَر عـــدّيت
أنا يا "سينا" - يا أمى – فى قنديلك ..
فتيلة .. و .. زيت
.........................
ولما ضمّــنى حضن اللقا .. بيكى
وبانت لى روابــــيكى
غسلْت بْــرمْلِـــتك وِشّـــى
لقيت الدمّ فى عْـــــروقى ..
ابتدا .. يمشى
ورغم الشدّة .. والأهوال
أحسّ الكلمة جوّايا ..بقِــت مـــوّال
ولما اخْــضرّ من تانى ..
القمر فيكى
وِ صِـــحْيت تانى أيامى اللـى
عـــاشت
عمرها بتْــئــنّ
وقلبى الكهْـــل م الفــــرحة ..
رجع تانى صغير السِّــنّ
زرعْـــت فْ تلّك العالى ..
علم غالى ..
بقلبى وروحى وِ عْـــــنيّـا
وكانت فرحتى بيكى ..
وكانت فرحِـــتك بـــيّا
كما الفرحة ف قلب الطفل ..
يوم العيد
كما فرحة لُــــقَـا العاشق .. بأحبابُـه ..
بلا مواعيد
......................
وعاد القلب جُـــوّايــــا يشِــعّ النِّـــــور
وِ طِــرْحِـــت كل أحــــلامى
نــــــــــــــــدَى ..
وِ زْهُـــــــــــــــور . .!
مساحة إعلانية
مساحة إعلانية
