مساحة إعلانية
مساحة إعلانية
من يقطع حبل الأفكار المجنونة
اللي هاتخنق عقلي
و يسيبني أنام
من غير ما أفكر
في النفس الداخل و الخارج
من صدري
من غير ما أخاف
م الثقب اللي بيوسع أكتر
في غلاف الأرض
و الأرض اللي في دورانها
بتقرب م الشمس
و الشمس اللي بتفقد كتلتها
بمرور الوقت
و قانون الجذب
و قانون الطفو
و بداية الخلق
و نهاية الكون
و الخوف اللي بيتملك قلبي ساعات
من غير تفسير
و خصوصا بالليل
لما تنام الناس
و الدنيا تبقى سكون
و الشارع هس
و احس ان انا محتاجة أصلي
صلاة الخوف
و اتعوذ من شيطان النفس
و قبل ما تبدأ صلواتي
يسألني بخبث
ايه يعني شيطان ؟
مخلوق زينا بيعيش
و يموت
و بيشعر
و يحس ؟
أو فكرة اتولدت فينا و بس
و تاخدني الفكرة
و هذا الكائن فيا
لوادي بعيد
مسكون بالجن
و أشوف الجن
شلة أصحاب
قاعدين على قهوة
بيدخنوا شيشة
و يسبوا الجن الحاكم
المتهاون مع واحد م الإنس
اتجرأ مرة و شكك في وجودهم
و اخاف يكتشفوا حقيقة أمري
اتحول كورة
يلمحني أصغر واحد منهم
‘ و يشوطني بقوة
يحدفني لكوكب تاني
احس كأني مجرد قزم
عمال يصغر يصغر يصغر ....
و أحس كأني حبة رمل
في صحرا كبيرة
أو صفر يتيم
محتاج في وجوده
لجدول ضرب
أنا جزء في كل
و كل في جزء
أنا ورقة في شجرة
و شجرة في غابة
و غابة في عالم لا متناهي
انا طير
و نبات
و نجوم ماتت
من كام مليون سنة ضوئية
أنا عطر في زهرة
و سم في أفعى
و نقطة مية في بحر
بتعيد تدويرها يوماتي
حرارة الشمس
انا بحر و صحرا
و ريح بتهيج و تعيد تشكيل حبات الرمل
انا موج بيعافر
طول الوقت يعدي الشط
انا مد و جزر
و مصدر طاقة
موجب فرح
و سالب حزن
يتحدوا في ذرة
يتخلق فيا دقة قلب
انا عقرب ساعة ليلاتي
بيزحف يم الموت
و اتخيل روحي لما تموت
اتخض و أفز بسرعة
اتحسس و وشي و ايدي و رجلي
ألقاني تمام
أنفض عني غبار كل الكوابيس
و أحاول أنام
أتعوذ من شيطان النفس
و الصبح أواصل يومي
كاني جريحة حرب .
مساحة إعلانية
مساحة إعلانية
مساحة إعلانية
مساحة إعلانية
مساحة إعلانية
