مساحة إعلانية
مساحة إعلانية
مش عاجبني اللعب
فركش
عايزة ألعب لعبة تانية
لعبة خارجة عن قانون الضرب في الحلبة المميتة
و الصراع الحتمي فيها
عشان أعيش
لعبة حلوة ما تنتهيش
لعبة أبقى فيها روح
بس روح
و لو ضروري يكون لي جسم
يبقى جسم خفيف عليا
جسم خارج عن قانون الجاذبية
جسم هارب من قانون الوقت خايف م التروس
كل ترس يفوت بيطحن حاجة فيا
حد يحدف طوبة يكسر
عقرب الساعة الغبية
عايزة أعمي عينيها
و اهرب منها مرة
حد يرمي ستارة سودا ع المجرة
عايزة أفتح عيني أشوفني
طلعت بره
من يمد إيديه لقلبي بورقة بيضا
عايزة أرسم لوحة تانية
لوحة فيها الضل دافي
و الإضاءة تكون خفية
لوحة فيها الروح جنينة
لما يدبل عطر وردة
يستمر في وردة تانية
لوحة أبقى فيها نقطة
في الفراغ
اللي حابة يكون نهائي
روحي تعبت
م المسافات البعيدة
و السؤالات العنيدة
و الإجابات البليدة
و الأبد
و السرمدية
كلها استعصت عليا
روحي تعبت
م البدايات البريئة
و النهايات الغبية
من يمد إيديه لقلبي بورقة تانية
عايزة أعيد شكل الحكاية
مش ضروري فيها حبكة
و خير و شر
مش ضروري تكون في حلبة
المصارع اللي فايز فيها
مصروع في النهاية
مش ضروري إن السيناريو الحتمي فيها ينحصر
بين ميلاد
و صراع
و موت
مش ضروري الناس تموت
مش ضروري للحكم صفارة يرهب بيها روحي
و لو ضروري نبدل الصفارة بس بصوت كمنجة
أو فلوت
..
فركش المرة دي بس
و بكرة نلعب لعبة تانية
في الحقيقة هي هي
نفسها اللعبة القديمة
تبتدي بشموع و فرح
و تنتهي بدموع هزيمة
مساحة إعلانية
مساحة إعلانية
مساحة إعلانية
مساحة إعلانية
مساحة إعلانية
