مساحة إعلانية
مساحة إعلانية
مرثية لوالدى – رحمه الله -
لما انت ناوى ع السفر
كان قلت لى
لاجلن ما احزم شنطتى
وامشى وراك كام يوم
كان قلت لى
لاجلن ما اعبى من حنانك
ضحكتى
وعرفت كيف تسرقنا سرقة
ولا حد منا يحس بيك
مع أنك انت مش كدا
ولا الخداع كان طبع فيك
ياااه
قلبك قسى
وقدرت تهجرنا يابوى
طب قلى يابا
سامحتنى ؟
على كل نظرة اتشعبطت فوق هدمتك
على كل آهة جات ف صدرك وجعتك
خبتها عنى بدون ما حس
سامحتنى ؟
يابو قلب اطهر م الوليد
يابو عزم أقوى م الحديد
كام مرة شخبطت الضيا
ف عنيك انا ؟
كنت اما تزعل تبتسم و 200 وجع
كان جوا قلبك يترسم
وف أول الليل ألتقيك
قافش ف ورد الأوليا
وأما تنام
قبل اما تقراها يس
ألمح براءة فوق شفايفك
وألتقيك بترتل الاخلاص
ولا حد شافك غيرى انا
من شاف دنا
من داق عرف
من طاف ف جواك دون م تأذنله نزف
يابو الحكاوى الليل ف بعدك
ليل طووويل
لو مرة شكشكنى الوجع قلبك يميل
سامحتى؟
لو نسيت اتوضى من مية رضاك
سامحتني ؟
ولو نويت افرش ضلوعي لأجل مااتهنى بلقاك
سامحتني؟
بالذمة من قلبك يابا ؟
كنت اسألك
عايز ايه يابه ؟
بيرد قلبك لأ مفيش !!!
وانا من غبايا اصدقك
لما انت ناوى تسيبنى كان وصيت عليا
مكبرش ابدا ع الوصية
وصتنى آآآآه
وصيتنى ليه ؟
ونسيت ف زحمة شوقك المكبوت
توصى عليا ليه ؟
مشتاق يا حج لقمرك الوناس
ولمهرك الشارد ما بين الناس
ولعمة خضرا وتوبك السندس
ولكام حورية يخدموك
ويهندموك
ويطيبوك
شد اللجام يابا واتكى
ع مهرك الحرنان
ددبان ميعرف غير طريق
الليل سفر
هاتوا الغفر والذكر والحضرة
ونسيتنى يابا
بين حيطان البيت حجر
لا لحقت اشوف ف الليل قمر
ولا رسمت على الحيطان الشمس
كام بنت بضفاير
وسافرت يابا بدون وداع
يااااااااه
سامحتني؟
وحياة مقام سدنا النبى
سامحتني؟
•في 24/ 7 /2024
مساحة إعلانية
مساحة إعلانية
