مساحة إعلانية
مش قادرة أقولك قد ايه!!!
وازاي وليه....
الليل طويل وانت بعيد
وقد ايه مليت من الشوق والحنين.
طاب انتَ فين ؟!.
واقف وبتعد الخطاوي؟!
والا غاوي
تزيد لهيب القلب لما
يفتكر لحظاته وياك دقتين.؟
من امتى كان البعد بيلين قلوب؟!
لا انا قادرة اقول مكتوب
واكمل
ذنب رافضه منه اتوب
ولا قادرة أرجع للبداية
بت آدم فى النهاية
والطريق طهر وغواية
والحياة تقوى وذنوب
فاكر زمان...
مش قلت ع الحلوة
وع المرة معايا مكملين؟
خلفت وعدك ؟!
والا هم أجبروك
تبعد وتقسى
والا يمكن كنت قاصد
لما تبعد عننا ترتاح وتنسى
خف رجلك ع الطريق
لو ناوي تمشي
واوع تنسى يوم ماكانت فرشتك ، نني ورمشى
يا اللي مكتوب فوق جبيني
افهم الشوق وحنيني
واشتريني
ياللى بالعمر اشتريتك.
قولي كلمة...
اروي بيها ارض عطشانه
وشقيانة سنين
يجرى ايه ...
لو قلت لي ،حقك عليا
ماانت روحي ونور عنيا
نظرة منك، تكفي اغفر بيها
ايام المواجع
يوم ما قلبي مد ايده
يمسح الدمع اللى نازل
فوق خدودي
قالي مهما طال غيابه
برضوا.....راجع.
مساحة إعلانية
