مساحة إعلانية
رزقك مابيد البشر م المولى جاى من فوق
إرجع لربك بقى م الغفله اصحى وفوق
وإن جار عليك الزمن والنور ف وشك طفى
صلى على المصطفى تسعد اكيد وتروق
................
انا بير هموم اتملى ماعرفش اوصافه
انا اللى ساعة المرض منى البشر خافوا
ارزع وداد وهنا مجنيش غير القسا
اشبه لفرع اتنسا وكل الشجر عافوا
...................
جوايا سهمك رشق هيفشى ولا طايش
ف القلب سابلى الالم وبواقى كام رايش
دايسنى قطر الهوى فوق قلبى عدا وفات
ميت من الاموات بضحك واقول عايش
..................
كتفى ف صلب الجمل يتحمل الشيله
واللى من اهله اتحرم انا قلبى ليه عيله
امشى معايا انا ماتشوفشى مره الكدر
واللى يفارق الشجر يتحمل القيله
.................
بلضم خبايا المعانى وبحضر الشاتت
بغزل حروف الهوى ولا برضى بالعاتت
بكتب كتير ع الهوى ولا سبت يوم الالم
وف إيدى ماسك القلم كنه صباع ساتت
.................
طبع الرجال انواع فيها البلح والليف
فيها اللى عاش منظره دهن الوشوش بالزيف
فيها اللى باطل قوى يدبح حمام الحرم
وناس ماليها الكرم تفرح بشوفة الضيف
...............
لا طمعت يوم ف الدهب ولا قولت يوم تبرى
ولا قولت قولنا وقال وذمتى تبرى
كل اما ازرع فرح اجنى الهموم التمن
دايره تروس الزمن وف جسمنا تبرى
..................
ياما سقيته الهنا وسقيته ودانى
يسمع كلام الفتن كان هلس ودانى
ياما راعيته انا يغلك وكنت اداديه
للفرح انا اوديه للهم ودانى
..............
يوم فرقوا الاوراق الفقر كان نايب
يوم جابوا ليا الخلق طلع الخلق دايب
ولا طولت كومى ف يوم ولا بصره جات لمى
سرقت انا ف كمى جا حظى ف الشايب
.............
الورد مهما دبل لو اشمه يكفيني
وحبيبى مهما بعد شايفه قصاد عينى
والعمر لو يتوهب كل السنين اديه
لو سابلى ثانيه انا فيه والله ترضينى
*مبادرة "كل يوم شاعر" التى يعدها ويقدمها الشاعر حمدى حسين
مساحة إعلانية
