مساحة إعلانية
أكبر مصيبة مرة تدين
ولا حد يعرف يواسي
للكلمة تلقى مردين
يشقوا شق المواسي
***
ف عينيك آيات مين تلاهم؟
يا اللي رموشك سبوني
شارب مرار من تلاهم
من يوم ما راحوا وسابوني
***
ما تقوليش إيه كان فاضلي
كل اللي راحوا ما عادوا
خليك يا قلبي ف ضلي
دا الفرح جاي ف معاده
***
ف الجرن قمحك وكِلناه
للعيش مع الملح واجب
ياك ورث ابوكي وكلناه
ف البصّة عاقصة الحواجب
***
غلبان ف مرة مسك تين
قالوا الغنى بان وتينك
دي جريمة واحنا ما ساكتين
يا تجيب يا نقطع وتينك
***
جه ف مسألة فات وحل
قال ف الحلول تلقى ياما
سألوه كمان فاتوحل
قال ارد يوم القيامة
***
لا ف فرحي سقف بكفّيه
وف حزني غايب ما عزّى
القلب فيه ال مكفّيه
ليه جاي يطلب معزّة
***
ترمي بلاها بلا اسباب
وتقول يا محلا دلعنا
فاتحة علينا الفلس باب
والله دلعك دا لعنة
***
وقدرنا حكمه سمعناه
ومعانا كنّه ما فارق
السر جا لموسى معناه
والخضر سايبه ومفارق
***
وانده وهما ما سامعين
والهجر عوده ما جاه ري
الدمع سادد مسام عين
يصرخ في سري وجهري
***
عنبك ما يوم حب تيني
و لا ورقه طارح ف نخلي
لو كنتي يوم حبتيني
كان جه قليبك و نخ لي
***
ساكنة بقلبي وبعيني
وانا قريبك بعيدك
ميتى تضمك باعيني
يا سابقة دايما بعيدك
***
كم صبح قال للمسا... فر
وابعد عن العين داجيرك
يا قلبي دايما مسافر
مين ف اغترابك يجيرك
* مبادرة "كل يوم شاعر" التى يعدها ويقدمها الشاعر حمدي حسين
مساحة إعلانية
