مساحة إعلانية
مساحة إعلانية
فاتت سنين ع البُعد والنسيان
ياما اترميت ولا حد كان سمّىٰ..
عدّت ليالي بعيشها ف العتمه
كان كُل همي بس لو ضمّه..
***********
شوفت القسىٰ وشربت ياما المُر
شوفت الكسور بتزيد ومش بتقِل..
شوفت الأيادي القاسيه حواليا
كُل اما اقوم تنزل عليا بغِل..
***********
داقِت عليا دايرة الاحزان
سِكنت ف قلبي يجي 100علّه..
انا روحي كانت ملكي دلوقتي
تشبِه ل أرض غريبه مُحتلّه..
***********
داير ف عالم مبني ع الخزلان
عايش ف دنيا كُلها أغراب..
انا كُنت ساكن بيت ماليه الفرح
دلوقتي ساكن جوّه عِش خراب..
***********
كان يحصل ايه..
لو كُنتي فضلتي وعِشنا اتنين
كان زاد العشق اللي ف قلبي..
كان يحصل ايه لو عِشنا سنين
ولا كانِشْ قلبك يلعبّي..
***********
مقتول ف البُعد ومش قادر
انسي انك كُنتي ف يوم روحي..
ده انا كُنت بطوّل ف سجودي
وادعي انك تبقي وما تروحي..
***********
بشتاق والشوق شاقِق قلبي
ف ارجع ل صورنا تطمّني..
كم مره اقولك وحشاني
وقساوة ردّك تقتلني..
كم مره اقولك مُتأسف
علي شئ محصلش تسامحيني..
كم مره حاولت ارجع تاني
كم مره اقولك ضُمّيني..
***********
ف يرد العقل من الحيره
ويقول كِفاياك..
حنّيت وحاولت وبزيادة
م كفايه هَلاك..
متأخر 100مليون خطوه
سايب قدامك 1000طريق
وبترجع تاني تبُص وراك..
***********
ف يردْ القلب من اللهفه
ويقول وحشاك..
حنيت وحاولت وبتحاول
ورايدها معاك..
متأخر يمكن كام خطوه
سايب قدامك برضو طريق
مش قادر تنسي انها بايعاك..
***********
ازاي تخوني الوعد وتسيبي
وازاي كده بسهوله تنّسيني..
ده ان كان ف قلبي 100وجع بايتين
كات نظرة منّك بس تشّفيني..
***********
ازاي قدرتي تدوسي وتعدّي
وازاي بكل سهوله بتسيبي..
شايلك ف عيني وعيني شيلاكي
ف ازاي قدرتي تفارقي وتغيبي..
ازاي
اول م دمعي يسيل
امسح بمنديلك..
وبرغم ذاك الوجع
انا لسه بدعيلك..
***********
برفع ايديّا واقول ياااارب..
إن كان علي حقي ف انا مسامح
وإن كان ع الحُزن أكيد هيروح..
إسعدها يارب ف أيامها
وما تجعل قلبها يوم مجروح..
ياااارب..
إن كان علي قلبي هيتحمَّل
وإن كان ع الدمع ف يوم هيجفْ..
إديها يارب احسن منّي
وان صابت قلبها يوم علّه اجعلها تخفْ..
***********
كداب لو قولت ف يوم هنسيٰ
والشوق ف القلب بيقتلني..
ده ان جات الدنيا عليا ف يوم
تفتح لي إيديها وتحضنّي..
***********
كداب لو قولت ب إني تمام
والقلب ف بُعدها بيعاني..
كم مره حاولت اكون قاسي
تظهرلي ف ليلي وتضحكلي
ف الاقيني بقُولها وحشاني..
وحشاني..
مساحة إعلانية
مساحة إعلانية
