مساحة إعلانية
من آخر صف لأول صف
وبنات بفيونكا
وولاد شطار
وعصاية في رف
النحو المكتوب بمزاج
وحساب معجون أسرار
وخرايط مرسومة بطريقة الشف
وكوتشي بخيط
حصة ألعاب والكل عبيط
وجرس مهزوز
وطابور أراجوز
تلاميذ على أول سكتها
كورق أخضر
ف أشجار اللوز
ومرايل صفرا جواها
منديل مخصوص جدًّا للنف
من أول صف لآخر صف
أستاذ ومصاحب طباشير
وإحنا الصاحيين خوفًا
من حرف يطير
حصة تعبير
والكل معبر عن بكره
بخيال رنان على
طبلة ودُف
من آخر صف لأول صف
.............
الورد الأحمر ..
الورد الأحمر خواف
بيخاف م الريح
دا بلون الدم
وعمره ما كان دوا للمجاريح
مهزوم في الصيف
في الشتا هفتان
م البرد كسيح
الورد الأحمر مولود سهرات
سر البرفان
كداب تفاريح
الورد الأحمر في البدلة
مش راحة وروح
ولا سكة بوح
دا عشان الحاسد يتكعبل
ويتوه عن عينه التوضيح
الورد الأحمر في تاريخ الأرض
المتفاعل
حريف تصاريح
............
بلا تلاكيك
يا سهم ليه متهان مع العياييل
الحُب مش قلبين وسهم عليل
الحُب مش تشابيك
فكرة بدون تهليل
مش بالكلام سطرين وصوت أساتيك
نط الحبال جرأة ومش تكتيك
الشمس عشقت ضي
والضي داب ف الشمس واتغندر
بلا تلاكيك
* مبادرة كل يوم شاعر التى يعدها ويقدمها الشاعر حمدي حسين
مساحة إعلانية
