مساحة إعلانية
مساحة إعلانية
طب هي ليه جريت كده
زي الزمن بقى ميت حصان ؟!
قطر الليالي المفتري
عمال يبعتر في السنين
و انا من يومين
واقف هناك ....
ب العب مع الواد الصبي
عمال بيلعب في التراب
وبيملا حجري باﻷمل
طب فين أمل ...؟!
ما ظهرش ليه ؟!
كان يجرى إيه ...
لو تهنا من عين الزمن
وهربنا من قطر الحياه ؟!!
شاااايخ يا نخلي في البلد
لسه بيلعب ع الطريق
و يرصص العمر في صور :
دي مدرسه
وهناك ضريح
كتاب حيطانه مشققه
طابور إذاعه وفي الصباح ....
و اختي صباح
لمسة إيديها كات شفا
أمي الحنونه الطيبه
بتزوع الأشواق رغيف
خليك نضيف
الشغل للغلبان شرف
باااااه ع الشرف
ده انا من زمان وانا باشتغل
وهم هم ال كام رغيف !!
ملعون رغيفك يا زمن
لما قايضت ع الحياه
بعتلنا وهم اسمه الأمل
و زرعت فينا ألف آآآه
الشمس بتحب المسا
و الليل بيفرد في الجناح
خايف يميل عود القسى
وابقى ال عاش ويا الجراح
و اما الزمان قال انتهى ...
ملقيش هناك وش الصباح
متأسفة .... ؟!!!!
على إيه يا دنيا خلاص بقى
بانت محطات الوصول
مهما نقول
قطر الزمان لازم يصفر في الميعاد
فات الميعاد يا قلبي انا
يارب خير
تختم نهاية رحلتي ...
و لا ان اصير ....
ده انا قلبي طير
سارح يسبح في الخيال
و لا يوم كفرت
و ان يوم شردت
طبع البشر
و انت الكبير
انت الكبير
*آخر ما كتبه الشاعر الراحل بكري جابر في يوم مولده الأخير
مساحة إعلانية
مساحة إعلانية
مساحة إعلانية
مساحة إعلانية
مساحة إعلانية
