مساحة إعلانية

منبر

المبدعون

ايه يا أنا .. للشاعرة المتميزة حنان شاهين

2026-11-15 07:28 AM  - 
ايه يا أنا .. للشاعرة المتميزة حنان شاهين
الشاعرة حنان شاهين

ايه يا أنا
حساك ليه مستسلمة
ما بتنطقيش
ما بتجرحيش الصمت 
حتى بنهنه
قومي اصرخي
اتمردي قولي انا
هى الفضيلة انك تكوني مستكينة و مهملة
و ﻻ الرضا يعني الخضوع ؟ !
جوايا ليه موجوع
و برغم دا ماشية باتمتم كل آيات الرضا
و احط همى بين قوسين
و احني رؤوس اﻷسئلة
و اجبر خطوطي المستقيمة عالركوع
يا أيها الذات اﻷنا
حرفك ماهوش نابض
صوتك ماهوش مسموع
فلتحذري
ممكن يكون الصمت فخ
ممكن تكون الجنة بس
 للي حس
و اللي أشبع رغبته
مش للي مات م الجوع
ممكن يكون للجنة شرط
انك تعدي السور 
أو تحفري فى الغيب ممر 
يوصلك للنور
يا أيها الذات اﻷنا 
حاولي تعدي السور
حاولي فى مرة تطلعي
تتسمع روحك على باب السما
تتجمعي غيمة ندى
تتنزلي على أرض بور
يا مؤمنة 
ان ابتداء روحك هناك
و ان انتهائك مش هنا
و ان الخروج م الجنة 
ما كانش بغواية
كان محض رغبة فى الخروج 
كان حبل سري بين وجودك و العدم
اسمه اﻷنا
ايه قوتك من ( أنا )
تدخل تفاصيل الحكاية المبهمة
و تفسرك صرخة مخاض
مشهد صعودك كل يوم ساعة المسا
على أعلى حته فى سطح بيتكم 
تبحثي عن أجوبة
مشهد نزولك و انت بتخبي قصيدتك
خايفة أمك تضربك
كانت حريصة انك تذاكري و تنجحي
بعض المشاهد مضحكة
و بعضها فيه وقت كافي للبكا
لما ينسدل الستار
و تعودى من حيث ابتدا بيك المسار
تتحولي حبة غبار
تتحل كل اﻷحجيات
 و تجاوبي كل اﻷسئلة 
ط . س . م
ك . ه . ي
يا موحدة بالله
يا مؤمنة بسر الحياة
ايه يبقي منك بعد موتك 
اﻻ ما خط القلم من خربشة
ممكن تسميها أنا 
هى أنا 
بذرة تمرد عالعدم
عنصر معادل للوجود 
و عشان يكون عنصر نشط
محتاج لجو من التحرر
محتاج سما
محتاج مجال شفاف 
و انت اللي يا ما علموا قلبك يخاف
و انت اللي يا حذروكى من خطورة اﻻنحراف
عن سطور الكراسات فى المدرسة
و انت اللي كنت بتخبي اﻻنا فى حبة قصايد
و انت اللي ياما كنت بتخبي القصايد 
جوا طاقة في جدار 
كاد أن ينفض يحدث زلزلة
فلتحذري 
كاد يوم الزلزلة ان يقترب
و هناك هتسأل كل نفس عن أناها
من أماتها قهرا و من أحياها 
جهزتي نفسك للسؤال 
و لا انت غاوية تهربي من الأسئلة
س  : هو انت مين ؟
ج  : انا واحدة من مﻻيين بشر عايشة و خﻻص
س : ليه ما روحتيش تطلبي منه الخﻻص
ج  : فكرت مرة بس خفت
س : بتفسري بايه جملتك  ( قلبي اللي رافض فيا شيء اسمه الزوال ) 
ج  : كانت قصيدة كتبتها و قطعتها 
س  : و تفسري بايه جملتك  ( ساعة تمرد و انفﻻت بره المدار )
ج  :  معقولة ممكن أتسال عن كل كلمة كتبتها 
غضباااان اله الشعر على روحك
واجب عليك تقدمي قربان
تدبحي صمتك و خوفك م الكلام
و تكتبي فى الكون قصيدة و ف الحياة و الموت
و تنفدي ان استطعت لسدرة الملكوت
لو تنفدي بسلطان 
ما كان خلق الكون للعايشين سدى
و ﻻ يوم هتبقى الجنة للخايفين  

مساحة إعلانية