مساحة إعلانية
لسه فاكرة
البيت بتاعنا من زمان
لسه فاكرة
بيوت حارتنا
و مصطبتنا
و الحصيرة الخوص
و لمتنا مع ولاد الجيران
لسه فاكرة ستى نعمة
كات حواديتها بتطبطب
على كتف المسا علشان ينام
لسه فاكرة
حكاية الشاطر حسن
و حكاية البنت اللى بتحب السهر
و اللى سايبة ضلها على سطح دارنا
و طالعة فوق تبعت رسايل للقمر
لسه فاكرة نجمتين
يبانوا حبة و يستخبوا
ورا سطح عم الشيخ أمين
لسه فاكرة عيون إيمان
و هى بتصحى العصافير النحاس فى شباك السرير
كل يوم الصبح بدرى
لسه فاكرة
لما كات الشمس تشرق
من غيطان القطن
و تصحى اليمام
اللى كان بيسبح الخالق زمان
زى صوت عم اسماعيل
اللي كان بيفتح النوار لمواله
و يزهر الياسمين
و يعطر النسمة اللى بتسابق غناوى الفلاحين
لسه فاكرة
عطر وردة حمرا مطبوعة على فستان حرير
لسه فاكرة فيونكة بيضا
كل حبة تفك من شعرى و تطير
لما كنت أجرى و أطير زى فراشات الربيع
وسط الخضار
لسه فاكرة
لما أمى كات تشيلنى فوق كتافها و تمشى بيا
و لما كنت بابقى صاحية و عاملة نايمة
و لما كنت بنام بجد
كان مفيش لخيالى حد
لسه فاكرة
لما كنت أطلع أنا و حبة عيال
فوق غصون الجازورينة
لسه فاكرة غصن فيها كان مطاطى عوده لينا
كنت أحسه يخاف علينا
زى جميزة ياسين
و زي كل ناس بلادنا الطيبين
ياااه ...
يا دفا البيت القديم
ساعات بيملانى الحنين
أقايض العمر اللى جى
و اللى فات
و أرجع أقضى هناك ساعات .
مساحة إعلانية
