مساحة إعلانية
مساحة إعلانية
(فى الذكرى السادسة لرحيل الشاعر عبد الناصر علام ينشر له موقع "منبر التحرير" قصيدة تحت عنوان ( مع إنى ) كتبها فى 19 -2-2016م)
مع إنى
الشاعر الراحل عبد الناصر علام
اشتقت وكانت غلطة
"ع " الكرسي مخلّص كل رصيدي
ومودّع باقي العمر بإيدي
والشحن مافيش
طب يعني مافيش من وصلك حاجة
طب مالها القسوة بتاعتك زايده الحد
وانا يعني غلطت "ف " ايه ؟ ..
علشان تلافيني قلامه وكوم شلاليت تكفيني
وانا با اطفح مر وعلقم
وانا با ادفع في الفواتير بالجملة
ومازلت ف حجم النملة
ومازلت الهارب من أيامه
وكأني عملتلي عمله
مع إني مطيع ومهاود
ومسامح
مع إني مواطن صالح
أنا شاري
ومداري جراحي بقش قليل
وبا اقسط في الأحلام بالسنتي
بس انتي مفاجأة
بتميلي علي المتاعيس..
وتحطي صوابعك جوه عنيهم
ولسانهم.. قاطعة لسانهم قطع
سوطك قطعلي اللحم الهدمة
وانا صوتي بينده..
بيقول لك : أنا في الخدمة
هااستحمل وقع الصدمة
الوقعة البيضا بتعرف ناسها
والوقعة السودة بتعرف ناسها
يا أرق وأنعم قبضة بتكسر سني
سني القوانين علي كيفك
سني السكاكين وسيوفك
لو عايزه كمان قرابين تتقدم
مش ها اندم ابقي كمان قربان
لو عايزه كمان ترمينا تحت تروس طواحينك
أنا راضي
ومرادي أشوفك ..
عناديه قصاد كبارات الكهنة
وقوية أبية ومش ممتهنة
وانا ادوسلك لايك
وانا اخدلك روحي واجيلك
لو دوستي عليا اللحظة
ولا حد ف ضهرك تاني هايوقف
فبلاش والنبي تتغمي عينيكي
أو تعملي مش شايفاني
أو شايفة بإني الغافل عنك
القافل كل أمال البكرة عليكي
أو شايفه بإني باهلفط
أو إني باشوف الدنيا بنظرة كئيبة
او شايفه بإني الجاني وكل كلامي قبيح
بالراحة عليا
بالراحة علينا وعلي أهالينا
"هكّعنا" " ف" عز شبابنا
عمّال الجوع يقرصنا
وسمعنا كتير.. ولدرجة قل سمعنا
الكدب ألمنا .. وجعنا ..خبطنا..
رزعنا علي الطرقات
والسارق فات .. والقاتل فات
والفاتل حبل مشانق روحنا ..استعدل فينا
عايشيين.. بس اتوفينا
باينين بس بتخفينا
واقفين فاردين الضهر..
القهر يميل فينا
بيمين ما اقدرش استغني
بالفقر انا صرت الأغني
ودماغي.. دماغنا بتوزن كل فعالك
أنا عادي ..مواطن عادي مسالم
ولا اعادي لحد
ولكني غريب عن "قومي"
والغربا معاي "بالكومي"
مقلوبة جيوبي وطالة من البناطيل بتكاكي
وإيديا بتقلب تعدل..
آخرتها معاكي
محفظتي مافيش
في الحيرة با اعيش
يا أميرة وتاج
يا ياقوت أو عاج
ياحارات وبيوت
ومابين الموت
ممتد الموت
وعشان مايعيش فيكي اللي مافيش
وعشان مايعيش فيكي المالاقيش
اديله المم
باعداني ف وقت الضم
وحفظت نشيدك صم
وولائي ما خسّش ذرة
ما لاحظتش إني غريب بالمرة
وبامر يوماتي باعدّي
ياللي انتي معايا و ضدي
ياللي انتي بناي و هدّي
ياللي انتي فضايا وسجني الواسع ردي
وبتاخدي حاجاتي..
هدومي ساعاتي.. وعادي تولي
من غير تصريح تستولي
وبتكسري مني معاولي
أنا ليا الحق استأنف ع الاحكام الجايرة عليا
يا "مرية" علي الأغراب.. وبترفض نبض عيالها
وتلمّع عملة رديئة قميئة
وتصمم تحمي ديولها
رغم الأحزان لو اطولك
لو أطولها
ها احضنها و أبوسها وأقول ربك مولاكي
وها أقول ربي يعدلها
مساحة إعلانية
مساحة إعلانية
