مساحة إعلانية
مساحة إعلانية
زعلانة منك
ومش راح اقول لك
زعلانة لية
لازم تفهم أنت لوحدك
امال حبك لازمته أيه ؟
ممكن أكون زعلانة لحاجة
حصلت كدا من كام أسبوع
أو على كلمة وسط خناقة
من سنة فاتت على موضوع
أو يمكن زعلانة عشان
نفسي فى حاجة
أصلاً هي مش على بالك
و دا تفسيره
أني أنا برضه مش على بالك
قلت وماله
هلوي فى بوذي
وأشندل حالك
يمكن تفهم يوم وتحس
ودا محصلش
خدها نصيحة واسمع مني
مابهزرش
لو هتحب يا فالح لازم
تتعلم معنى الإشارات
والحوارات دى والحركات
وتفك يا فندي الشفرات
وخش دماغنا وعيد ترتبها
وخد أفكارنا وقوم فسرها
على قد جناننا وأفعالنا
وساعتها و بس هتفهمنا
ونبقى لك كتاب مفتوح
ولك عيشه ترد الروح
ونتصافى ويهدى الموج
وتلقى الفرح مترطرط
وخير بالكوم
أصل احنا الحريم عتبات
وفي منا كتير مليكات
لكن عيبنا
مافيش كتالوج
بتبسطنا أقل حاجات
وتشغلنا كتير تفاهات
وبنحاسب على الهفوات
ولا ننسى أذى لو فات
لو حبنا بنسامح
وساعة الغدر ما نسميش
كلامنا كتير ماينفضش
ولو بايت من امبارح
وتلاهينا كتير تفاصيل
ويكرمنا كريم وأصيل
وكيدنا يغرقك فى الزير
ومهما حاولت تفهمنا
ما يوم توصل لاخر البير
تروح البحر لو عايم
تعود عطشان
وتغرق فى غرام شبرين
ولو نغضب فكيدنا عظيم
يرفع له الشيطان تعظيم
ولو نفرح بنبقى ملاك
بيوفي لك بكل جميل
ولو نرضا تعيش مرتاح
ومتغرق نعيم فى نعيم
مساحة إعلانية
مساحة إعلانية
